Telenor Games 2026: Kanonball
Team Top-Floor til topps i kanonball
Atter ein gong beinhard konkurranse, og ein ny vinnar: Team Top-Floor gjekk til topps i kanonball i Telenor Games, framfor KON-KAMeratene og B-Laget.

Namnet forplikta – Team Top-Floor enda på øvste nivå også i resultatlista. Med 17 konkurransepoeng sikra laget seg førsteplassen, tre konkurransepoeng framfor KON-KAMeratene med 14. B-Laget tok tredjeplassen med 10.
Åtte lag og 31 deltakarar var med i oppgjeret. Padelvinnaren B-Laget måtte denne gongen sjå to lag framfor seg, medan KON-KAMeratene følgde opp andreplassen frå padel med endå ein andreplass.
Full utteljing til Team Top Floor
Førsteplassen gav Team Top-Floor 12 resultatpoeng. Saman med åtte deltakarpoeng vart det 20 totalpoeng og siger også på totalpoenglista. KON-KAMeratene enda med 18 totalpoeng, medan B-Laget fekk 16.

Bak palltrioen tok Lag X fjerdeplassen med 14 totalpoeng. Aksessalliansen og Telechubbies delte femteplassen med 13, følgde av Telesnuppene med 11 og Signalling Storm med ni.
Resultata viser at konkurransepoeng ikkje åleine avgjorde den endelege plasseringa. Signalling Storm og Telechubbies hadde begge 3 konkurransepoeng, men Telechubbies fekk fleire deltakarpoeng og enda høgare på totalpoenglista.
På toppen var konklusjonen klar: Team Top-Floor hadde både flest konkurransepoeng og flest totalpoeng. I eit oppgjer der ingenting var avgjort før siste slutt, var det dei som kunne feire sigeren.